01 May 2026-cı il tarixində Naxçıvan Dövlət Universiteti Tələbə Elmi Cəmiyyətinin təşkilatçılığı ilə “Qlobal Güclərin Yaxın Şərq rəqabəti və regional təhlükəsizlik faktoru” mövzusuna həsr olunmuş elmi-nəzəri dəyirmi masa keçirilib.

Tədbirdə universitetin “Beynəlxalq münasibətlər” kafedrasının müəllimləri — tarix elmləri doktoru, dosent Emin Şıxəliyev, İlahə Sadıqova, Nazlı Rzayeva və “Ümumi hüquq” kafedrasının müəllimi Yunis Xəlilov iştirak edərək müasir geosiyasi mənzərəyə dair strateji təhlillərini təqdim ediblər.

Diskussiya formatında keçən görüşdə “Hüquqşünaslıq”, “Beynəlxalq münasibətlər” və “Dövlət və ictimai münasibətlər” ixtisasları üzrə təhsil alan tələbələr aktiv iştirak edərək mövzu ətrafında məruzələrlə çıxış ediblər.

Beynəlxalq münasibətlər sisteminin mürəkkəb və dinamik bir dövr yaşadığını vurğulayan dosent Emin Şıxəliyev formalaşan “Yeni Dünya Nizamı”nın yeni əməkdaşlıq formatları və regional maraqlar balansı üzərində qurulduğunu diqqətə çatdırıb. Hüquqi aspektlərə toxunan Yunis Xəlilov isə beynəlxalq hüququn yalnız nəzəri olaraq məhdudlaşmamalı olduğunu, onun müasir reallıqlarla uzlaşdırılaraq icrasının təmin edilməsinin dövlətlərin qarşısında duran fundamental öhdəlik olduğunu qeyd edib.

Məruzəçi müəllimlərdən İlahə Sadıqova və Nazlı Rzayeva Yaxın Şərqdə cərəyan edən proseslərin qlobal təhlükəsizlik arxitekturasına təsirlərini analiz edərək, bu prosesdə regional sabitliyin qorunmasının zəruriliyini əsaslandırıblar.

Tələbələrin yüksək fəallığı və qarşılıqlı fikir mübadiləsi ilə davam edən dəyirmi masa gənc tədqiqatçıların analitik bacarıqlarının artırılması baxımından mühüm platforma rolunu oynayıb.

Tədbir iştirakçıların birgə xatirə fotosunun çəkdirilməsi ilə yekunlaşıb.

#ndu #ndutec #azerbaijan #nakhchivan #DəyirmiMasa #East #international #relation