🔹 09 aprel 2026-cı il tarixdə Naxçıvan Dövlət Universiteti Tələbə Elmi Cəmiyyətinin təşkilatçılığı ilə “Rəqəmsal dünyada sağlamlıq: Texnologiyanın fiziki və psixi təsirləri” mövzusunda maarifləndirici təlim keçirilmişdir.

🔸 Təlim “Pedaqogika və psixologiya” kafedrasının müəllimi, pedaqogika üzrə fəlsəfə doktoru Kübra Quliyeva və “Psixologiya” ixtisası II kurs tələbəsi Şəmsiyə Babayeva tərəfindən təqdim olunmuşdur. Tədbirin əsas məqsədi rəqəmsallaşmanın sürətlə artdığı müasir dövrdə texnologiyanın insan sağlamlığına təsirlərini elmi əsaslarla izah etmək, bu istiqamətdə tələbələrin məlumatlılığını artırmaq və sağlam rəqəmsal davranış vərdişlərini təşviq etmək olmuşdur.

🔹 Təlim zamanı iştirakçılara texnoloji asılılığın yaranma səbəbləri, onun gündəlik həyat fəaliyyətinə və psixoloji rifaha təsirləri haqqında ətraflı məlumat verilmişdir. Eyni zamanda, uzunmüddətli ekran istifadəsinin görmə, yuxu rejimi və ümumi fiziki sağlamlıq üzərində yaratdığı risklər, eləcə də bu risklərin minimuma endirilməsi yolları müzakirə olunmuşdur.

🔸 Çıxış edənlər virtual mühitin şəxsiyyətin formalaşmasına, emosional vəziyyətinə və sosial münasibətlərinə təsirini həm müsbət, həm də mənfi aspektlərdən təhlil etmiş, sosial şəbəkələrin düzgün və balanslı istifadəsinin vacibliyini vurğulamışlar. Bununla yanaşı, rəqəmsal gigiyena anlayışı, informasiya təhlükəsizliyi və fərdi psixoloji sağlamlığın qorunması üçün praktiki tövsiyələr iştirakçıların diqqətinə çatdırılmışdır.

🔹 Təlim interaktiv müzakirələrlə davam etmiş, iştirakçıların sualları cavablandırılmış və onların mövzu ilə bağlı fikirləri dinlənilmişdir. Sonda xatirə fotosu çəkilmişdir.

#ndu #ndutec #azerbaijan #nakhchivan #training