NDU nəzdində Gimnaziyanın Şagird Elmi Cəmiyyəti

Hüseyn Tahirov

Sədr

Hüseyn Tahirov Naxçıvan Dövlət Universitetinin nəzdində fəaliyyət göstərən Gimnaziyanın XI sinif şagirdi və həmin gimnaziyanın Şagird Elmi Cəmiyyətinin sədridir. O, ilk təhsilini Ordubad rayon İnternat məktəbində almış, daha sonra Naxçıvan Dövlət Universitetinin nəzdində Gimnaziyaya Naxçıvan Muxtar Respublikası üzrə yüksək nəticə ilə qəbul olmuşdur. 9-cu sinif buraxılış imtahanında 291 bal nəticə göstərmişdir. Hüseyn Tahirov məktəb illərindən etibarən elm, texnologiya və innovasiya sahəsində fəal iştirak etmiş, bir sıra mühüm akademik və elmi nailiyyətlər əldə etmişdir. O, VI və VII Respublika Robot Olimpiadalarında Azərbaycan üzrə I yerə layiq görülmüş, həmçinin STEAM Azərbaycan Festivalında ölkə üzrə II yer, Respublika Fənn Müsabiqələrində isə riyaziyyat fənni üzrə yüksək nəticə əldə etmişdir. Bundan əlavə, Naxçıvan MR Təhsil Nazirliyi tərəfindən təşkil olunan STEAM yarışlarında 6 dəfə qalib olmuşdur. Beynəlxalq səviyyədə də Azərbaycanı uğurla təmsil edən Hüseyn Tahirov, 110-dan çox ölkənin iştirak etdiyi Dünya Robot Olimpiadasında 2023-cü ildə Panama şəhərində, 2024-cü ildə isə Türkiyənin İzmir şəhərində ölkəmizin nümayəndəsi olmuşdur. O, innovasiya və startap sahəsində də aktiv fəaliyyət göstərir. Hüseyn Tahirov tərəfindən yaradılan “BioScript” layihəsi Azərbaycan Respublikasının Əqli Mülkiyyət Agentliyində rəsmi qeydiyyatdan keçmiş və şəhadətnamə ilə təsdiqlənmişdir. O, bu layihə ilə rəsmi qeydiyyatdan keçmiş layihənin ən gənc müəlliflərindən biri olmuşdur. Bundan əlavə, BioScript layihəsi ilə İnnoStart-1 hakatonunda III yer qazanmış və layihə investisiya dəstəyi əldə etmişdir. Rəqəmsal texnologiyalar sahəsində fəaliyyət göstərən Hüseyn Tahirov, bir sıra rəsmi və innovativ platformaların müəllifidir. O, Naxçıvan Dövlət Universitetinin İstedad Mərkəzinin rəsmi saytının, Tələbə Elmi Cəmiyyətinin rəsmi saytının və digər rəqəmsal platformaların hazırlanmasında iştirak etmişdir. Onun fəaliyyəti Naxçıvan Dövlət Universiteti, Azərbaycan Respublikası Elm və Təhsil Nazirliyi, AR Təhsil İnstitutu, Naxçıvan MR Təhsil Nazirliyi, AR Gənclər və İdman Nazirliyi və digər dövlət qurumları tərəfindən yüksək qiymətləndirilmiş və müxtəlif diplom və sertifikatlarla təltif olunmuşdur. Eyni zamanda, onun elmi-texnoloji fəaliyyəti AZTV, Real TV, Naxçıvan TV, APA TV və digər media qurumlarında işıqlandırılmışdır. Hazırda Hüseyn Tahirov Şagird Elmi Cəmiyyətinin sədri kimi gimnaziyada elmi fəaliyyətin inkişafına, şagirdlərin elmə və tədqiqata marağının artırılmasına, innovativ layihələrin və elmi təşəbbüslərin təşviqinə rəhbərlik edir.